ពោធិ៍សាត់ ៖ នៅរសៀលថ្ងៃទី១៦ ខែកក្កដា ឆ្នាំ២០២២ លោក ហោ គន្ធា ប្រធានក្រុមប្រឹក្សាភិបាល នៃក្រុមហ៊ុនស្វាសធីកាអ៊ិនវេសមិនឯ.ក និងជាប្រធានសមាគមអភិវឌ្ឍន៍វិជ្ជាជីវៈអ្នកសារព័ត៌មានកម្ពុជាបានបើកវគ្គសិក្ខាសាលាស្ដីពីៈផ្នត់គំនិតលក់កម្រិតខ្ពស់ជូនបុគ្គលិកនិងភ្នាក់ងារលក់គម្រោងអភិវឌ្ឍដីឡូត៍លំហែ”សួនចំការបុរីទេសចរណ៍”ប្រមាណជាង១០០នាក់នៅសណ្ឋាគារច័ន្ទមណ្ណីមណ្ណីច័ន្ទក្រុងពោធិ៍សាត់ខេត្តពោធិ៍សាត់។
ឆ្លៀតក្នុងឱកាសអង្គសិក្ខាសាលា លោក ហោ គន្ធា បានលើកឡើងថាវិស័យអចលនទ្រព្យនៅតែជាអទិភាពក្នុងការស្វែងរកប្រាក់ចំណូលខ្ពស់ទោះស្ថិតក្នុងស្ថានភាពការរាតត្បាតនៃជម្ងឺកូវីដ១៩ក៏ដោយភ្នាក់ងារលក់ឬអ្នកលក់ចលនទ្រព្យគប្បីរៀនរស់និងបត់បែនតាមកាលៈទេសៈព្រមទាំងចេះធ្វើការវិភាគនិងផ្លាស់ប្ដូរការគិតស្វែងរកតម្រូវនៃការចង់បានរបស់អតិថិជនដើម្បីឆ្លើយតបទៅនឹងទីផ្សារបច្ចុប្បន្ននិងអនាគត់។
លោកហោគន្ធាថែមទាំងលើកទឹកចិត្តឱ្យអ្នកមានបំណងលក់អចលនទ្រព្យចាប់ផ្តើមធ្វើការលក់ឡើងវិញ ព្រមទាំងមានជំនាញលក់ឱ្យពិតប្រាកដ ដើម្បីកសាងប្រាក់ចំណូលខ្ពស់សម្រាប់ជីវភាពប្រចាំថ្ងៃនិងប្រចាំខែ ។ ហើយលោកបានសង្កត់ធ្ងន់ថា អ្នកលក់គប្បីត្រូវយល់ពីជំនាញលក់ឱ្យច្បាស់លាស់ មុននឹងសម្រេចចិត្តធ្វើការលក់ ពោលគឺត្រូវស្វែងយល់ឱ្យច្បាស់ពីព័ត៌មានផលិតផល ឬសេវាកម្មត្រូវចេះធ្វើបទបង្ហាញ ឬតិចនិចលក់ ត្រូវមានឥរិយាបថលក់ល្អ ។ លោកបានបន្ដទៀតថា ជំនាញលក់ជាចំណុចអទិភាព ក្នុងការធ្វើអាជីវកម្ម ដើម្បីស្វែងរកប្រាក់ចំណូល។
សិក្ខាកាមដែលបានចូលរួមប្រមាណជាង១០០នាក់មានសេចក្ដីរំភើបរីករាយក្រោយពីទទួលបានចំណេះដឹងនិងបទពិសោធន៍ថ្មីៗពីការលក់អចលនទ្រព្យនិងពោរពេញដោយស្នាមញញឹមគ្រប់ៗគ្នា ៕
