ខេត្តកំពង់ស្ពឺ៖ រថយន្តប្រភេទបែនដឹកដី ដែលលួចដឹកឈើប្រភេទម្រេញពេញប្រៀបត្រូវបានកម្លាំងអង្គការដើម្បីអភិវឌ្ឍន៍និងការពារធនធានធម្មជាតិហៅកាត់ថា(NRPDO)ធ្វើការឆ្មក់បង្ក្រាបបាន ខណៈដែលមេឈ្មួញចាស់វស្សា ប្រចាំស្រុកឱរ៉ាល់ល្បីឈ្មោះមួយរូបដឹកជញ្ជូនទាំងថ្ងៃចេញពីតំបន់ជាំមកស្តុកនៅក្នុងផ្ទះរបស់មេឈ្មួញឧក្រិដ្ឋកម្មព្រៃឈើរូបនោះនៅក្នុងភូមិដំបងវេញ ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ រួចដឹកជញ្ជូនបន្តទៅលក់នៅរាជធានីភ្នំពេញ នឹងចេញទៅលក់នៅឯប្រទេសវៀតណាម។
ការបង្ក្រាបរថយន្តបែនដឹកឈើម្រេញរបស់មេឈ្មួញចាស់វស្សាពីសំណាក់អង្គការដើម្បីអភិវឌ្ឍន៍ និងការពារធនធានធម្មជាតិហៅកាត់ថា(NRPDO) ខាងលើនេះកាលពីថ្ងៃទី២២ ខែកញ្ញា ឆ្នាំ២០២៣ នៅតាមបណ្តោយផ្លូវលំ ក្នុងភូមិតាក្រាំង ឃុំតាសាល ស្រុកឱរ៉ល់ ខេត្តកំពង់ស្ពឺ។
តាមប្រភពព័ត៌មានបានបង្ហើបឱ្យដឹងថា ការបង្ក្រាបរថយន្តបែនដឹកឈើរបស់មេឈ្មួញឧក្រិដ្ឋកម្មព្រៃឈើនេះ ដោយមានការតាមដានអស់រយះពេលជាច្រើនខែមកហើយ ទើបឈានទៅដល់ការបង្ក្រាបបានបែបនេះ។ ការបង្ក្រាបរថយន្តដឹកបទល្មើសនេះក៏មានការសហការជាមួយបណ្តាញសម្ងាត់ក្នុងការរាយការណ៍ មកអង្គការផងដែរ។
ប្រភពដដែលបានបន្តថា រថយន្តបែនដឹកឈើម្រេញខាងលើនេះជាប្រភេទរថយន្តបែន ក្បាលពណ៌សលាយសំបកឪឡឹក ពាក់ផ្លាកលេខកំពង់ស្ពឺ3A-3231 ជារបស់មេឈ្មួញចាស់វស្សាឈ្មោះ ណុប ឌី ហៅឆើត អាយុជាង៤០ឆ្នាំ រស់នៅក្នុងភូមិដំបងវេញ ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ។ ហើយការដឹកជញ្ជូនឈើម្រេញខាងលើនេះចេញពីតំបន់ជាំ ដែលជាកន្លែងស្តុបឈើដ៏ធំប្រចាំតំបន់ស្រុកឱរ៉ាល់តែម្តង។ ម្យ៉ាងទៀតការដឹកជញ្ជូនឈើតាមរថយន្តគ្រប់រូបភាពរបស់មេឈ្មួញចាស់វស្សារូបនោះឆ្លងកាត់ស្នាក់ការបរិស្ថាន សមត្ថកិច្ចតាមដងផ្លូវមាន កម្លាំងអាវុធហត្ថលើផ្ទៃប្រទេស និងកម្លាំងអាវុធហត្ថស្រុកឱរ៉ាល់ កម្លាំងនគរបាលសេដ្ឋកិច្ចក្រសួងមហាផ្ទៃ និងកម្លាំងនគរបាលសេដ្ឋកិច្ចខេត្តកំពង់ស្ពឺ ព្រមទាំងស្នាក់ការមេព្រៃជាច្រើនកន្លែងថែមទៀតផង។ ប៉ុន្តែអស់លោកសមត្ថកិច្ចនិងជំនាញទាំងអស់នោះ មិនដែលចាប់បង្ក្រាបរថយន្តដឹកឈើរបស់មេឈ្មួញចាស់វស្សាឈ្មោះណុប ឌី ហៅឆើត បានម្តងណាឡើយ ទាល់តែអង្គការដើម្បីអភិវឌ្ឍន៍និងការពារធនធានធម្មជាតិ ចុះបង្ក្រាបទើបលេចមុខអស់លោកសមត្ថកិច្ចជំនាញមកសហការ ដើម្បីកុំឱ្យថ្នាក់លើស្តីបន្ទោសតែប៉ុណ្ណោះ។
ប្រភពព័ត៌មានបន្តបន្ថែមទៀតថារថយន្ត ដឹកឈើរបស់មេឈ្មួញចាស់វស្សាឈ្មោះ ណុប ឌី ហៅឆើតដែលអង្គការNRPDOបង្ក្រាបបាននេះ មានចំនួន១៥កំណាត់ ជាង៧ម៉ែត្រគូប មុខកាត់ធំៗ ៥០ជុំ។ ក្រោយពីអង្គការNRPDO ធ្វើការបង្ក្រាបបានប្រគល់ឱ្យទៅជំនាញបរិស្ថានខេត្តកំពង់ស្ពឺ នឹងយករថយន្តដឹកបទល្មើសព្រៃឈើនោះ ទៅរក្សាទុកនៅស្នាក់ការដែនជម្រកសត្វព្រៃភ្នំឱរ៉ាល់ដើម្បីកសាងសំណុំរឿងចាត់ការបន្តតាមផ្លូវច្បាប់៕
