ខេត្តកំពត ៖ ល្បែងមាន់ជល់តាមអនឡាញ កំពុងតែពេញនិយមមួយសំបុកឋិត នៅភូមិតូច និងភូមិឃ្មៀ ឃុំក្រាំងស្នាយ ស្រុកឈូកខេត្តកំពត ខណៈដែលម្ចាស់ល្បែងស៊ីសងសប្បាយចិត្តដេកញញឹមនិងបានផលដោយសារល្បែងស៊ីសងទាំងអស់នេះ ។
ប្រភពចេញពីប្រជាពលរដ្ឋដែលសុំមិនបញ្ចេញឈ្មោះ នៅក្នុងភូមិតូច ឃុំក្រាំងស្នាយ ដែលមានសំបុកល្បែងស៊ីសងគ្រប់ប្រភេទ ដូចជាមាន់ជល់តាមអនឡាញ ឆ្នោតឡូតូ ឆ្នោតកន្ទុយលេខ និងល្បែងស៊ីសងផ្សេងៗទៀត បានដាក់ការសង្ស័យថា តើអាជ្ញាធរ និងសមត្ថកិច្ចឃុំស្រុកខេត្តបានផល (លាភសក្ការៈ) ពីទីកន្លែងនេះឬយ៉ាងណា? បានជាពួកអស់លោកមិនបង្ក្រាបសោះ ។ ជាលទ្ធផល ធ្វើឲ្យក្នុងភូមិតូចឃុំក្រាំងស្នាយ មានអសន្តិសុខនិងគ្មានសណ្ដាប់ធ្នាប់សង្គម បណ្ដាលធ្វើឲ្យពួកគាត់ជាប្រជាពលរដ្ឋរស់នៅក្នុងភូមិឃុំមានការភ័យខ្លាចជារៀងរាល់ថ្ងៃ ។
ពាក់ព័ន្ធនឹងបញ្ហានេះ លោកវរសេនីយ៍ឯក ប៉ោ យ៉ា អធិការដ្ឋាននគរបាលស្រុកឈូក និង លោក មឿន សុខន មេប៉ុស្តិ៍ក្រាំងស្នាយ ខណៈពេលក្រុមសារព័ត៌មានព្យាយាមទាក់ទងសុំការបំភ្លឺ ខលមិនលើកទូរស័ព្ទ ។
មានការលើកឡើងថា តើលោកអធិការស្រុកឈូក និងលោកស្នងការខេត្ត លោកមានហេតុផលអ្វី ទើបបានជាបានជាគាត់មិនសហការជាមួយសមត្ថកិច្ចចម្រុះ ឬមួយក៏អស់លោកអាជ្ញាធរ សមត្ថកិច្ចដែនដីទាំងអស់នេះ ពួកគាត់លែងខ្វល់អំពីការស្ដីបន្ទោស ឬដកតួនាទីស្អីនោះអស់ហើយ ។
ពលរដ្ឋបានសំណូមពរ ដល់ ក្នុងនាមជាអាជ្ញាធរ និងសមត្ថកិច្ចដែនដី សូមអស់លោកមេត្តាយកចិត្តទុកដាក់ពីសុខទុក្ខ របស់ប្រជាពលរដ្ឋ ដែលរស់នៅក្នុងមូលដ្ឋានរបស់ខ្លួនផង ក្នុងនាមជាមន្ត្រីរាជរដ្ឋាភិបាល ធ្វើការជូនរាជរដ្ឋាភិបាល បម្រើរាស្ត្រ ជៀសវាងដូចការសង្ស័យថា ឱ្យតែ បានប្រាក់ចំណូលច្រើនក្នុងមួយខែមួយខែ ដេកញញឹម សម្ងំទទួលផលពីក្រុមល្បែងស៊ីសងទាំងអស់នេះ ទាន !
