(ខេត្តកែប)៖ នៅរសៀលថ្ងៃទី៣១ ខែតុលា ឆ្នាំ២០១៩ មន្ទីររៀបចំដែនដីនគរូបនីយកម្ម សំណង់ និងសុរិយោដីខេត្តកែប បានរៀបចំពិធីប្រកាសបិទផ្សាយជាសាធារណៈនូវឯកសារនៃការវិនិច្ឆ័យការចុះបញ្ជីដីធ្លីមានលក្ខណៈជាប្រព័ន្ធ ស្ថិតក្នុងភូមិភ្នំលាវ ឃុំពងទឹក ស្រុកដំណាក់ចង្អើរ ខេត្តកែប ក្រោមអធិបតីភាព លោក កែន សត្ថា អភិបាល នៃគណៈអភិបាលខេត្តកែប។
ពិធីនេះក៏មានការអញ្ជើញចូលរួមពីលោកប្រធានមន្ទីរពាក់ព័ន្ធ និងមន្ទីរអង្គភាពជំនាញជុំវិញខេត្ត កងកម្លាំងទាំងបី អភិបាលស្រុកដំណាក់ចង្អើរ អាជ្ញាធរមូលដ្ឋាន និងប្រជាពលរដ្ឋក្នុងតំបន់ខាងលើ។
តាមរបាយការណ៍របស់ លោក វ៉ៅ សុខា ប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្តកែប បានឲ្យដឹងថា នីតិវិធីនៃការចុះបញ្ជីដីធ្លីមានលក្ខណៈជាប្រព័ន្ធមាន៥ដំណាក់កាលរួមមាន៖
ទី១-ត្រៀមរៀបចំ គឺការកំណត់តំបន់ធ្វើការវិនិច្ឆ័យ ការបង្កើតគណៈកម្មការរដ្ឋបាល ការជូដំណឹង កិច្ចប្រជុំផ្សព្វផ្សាយ និងដំណើរការផ្សព្វផ្សាយ ពីការចុះបញ្ជីដីធ្លីមានលក្ខណៈជាប្រព័ន្ធ។
២-ប្រតិបតិ្តការបច្ចេកទេស គឺការចុះកំណត់ព្រំ វាស់វែង និងវិនិច្ឆ័យ ដើម្បីកសាងប្លង់សុរិយោដី និងបញ្ជីឈ្មោះម្ចាស់ដី។
៣-បិទផ្សាយសាធារណៈនូវឯកសារនៃការវិនិច្ឆ័យ (ប្លង់សុរិយោដី និងបញ្ជីឈ្មោះម្ចាស់ដី) រយៈពេល១៥ថ្ងៃ ដើម្បីទុកលទ្ធភាពឲ្យម្ចាស់ដី និងអ្នកដែលពាក់ព័ន្ធ ធ្វើការផ្ទៀងផ្ទាត់ឈ្មោះ ស្ថានភាពគ្រួសារ និងក្បាលដីរបស់ខ្លួន ព្រមទាំងធ្វើការតវ៉ា ក្នុងករណីមានការខុសឆ្គង។
៤-សម្រេចលើឯកសារវិនិច្ឆ័យ គឺរបាយការណ៍ពីលទ្ធផលនៃការបិទផ្សាយជាសាធារណៈ នូវឯកសារនៃការវិនិច្ឆ័យរបស់គណៈកម្មការរដ្ឋបាល ជូនអភិបាលខេត្តដើម្បីពិនិត្យ និងសម្រេចលើការផ្តល់សិទ្ធិចំពោះក្បាលដីណាដែលមិនមានទំនាស់ ឬមិនមានពាក់ព័ន្ធនឹងដីរដ្ឋ។និងទី៥-ការចុះបញ្ជីប័ណ្ណ និងចែកប័ណ្ណជូនម្ចាស់ដី។
ក្នុងឱកាសនោះដែរ លោក កែន សត្ថា អភិបាលខេត្តកែប បានបញ្ជាក់ថា ការកំណត់វិនិច្ឆ័យចុះបញ្ជីដីធ្លីជាលក្ខណៈប្រព័ន្ធ គឺត្រូវឆ្លងកាត់ច្រើនដំណាក់កាល ដូចជាការផ្សព្វផ្សាយប្រកាសកំណត់តំបន់វិនិច្ឆ័យ ពិសេសការជូនដំណឹងជាសាធារណៈដល់ប្រជាពលរដ្ឋក៏ដូចជាសាធារណៈជនទាំងអស់ ដោយផ្សព្វផ្សាយតាមរយៈ វុទ្យុ ទូរទស្សន៍ និងបណ្តាញសារព័ត៌មានផ្សេងៗ ដើម្បីឲ្យម្ចាស់ក្បាលដីដែលមានទីលំនៅឆ្ងាយបានជ្រាប និងមកចង្អុលបង្ហាញទីតាំងព្រំប្រទល់ដីរបស់ខ្លួនដើម្បីផ្តល់ជាព័ត៌មាន និងឯកសារចាំបាច់ដល់មន្ត្រីអនុវត្តការងារចុះបញ្ជីដីធ្លីមានលក្ខណៈជាប្រព័ន្ធ។
លោក កែន សត្ថា បានបញ្ជាក់បន្ថែម ដោយជំរុញដល់បងប្អូនប្រជាពលរដ្ឋដែលមានក្បាលដីនៅភូមិភ្នំលាវ ឃុំពងទឹក ស្រុកដំណាក់ចង្អើរ ខេត្តកែប ទាំងអស់មេត្តាចូលរួមពិនិត្យទិន្នន័យដែលបានបិទផ្សាយក្នុងរយៈពេល១៥ថ្ងៃ(រាប់ទាំងថ្ងៃឈប់សំរាក)ដែលមានទីតាំងស្ថិតនៅ “ផ្ទះមេព្រៃ” ក្នុងឃុំពងទឹក ដើម្បីធានានូវភាពត្រឹមត្រូវ ក្នុងករណីពិនិត្យឃើញថា ទិន្នន័យដែលបានបិទផ្សាយពុំមានភាពជាក់លាក់ ឬមិនពេញលេញ មិនគ្រប់គ្រាន់ សាធារណៈជនទាំងអស់ និងស្ថាប័នពាក់ព័ន្ធ មានសិទ្ធិសុំមន្ត្រីជំនាញជួយបំភ្លឺលើខ្លឹមសារនៃឯកសារដែលបានបិទផ្សាយជាសាធារណៈនោះ។
ជាចុងក្រោយ លោកអភិបាលខេត្តកែប ក៏សូមផ្តាំផ្ញើដល់មហាជន ពិសេសប្រជាពលរដ្ឋគ្រប់មូលដ្ឋាន សូមកុំជឿការញុះញង់របស់ក្រុមឧទ្ទាមក្បត់ជាតិ មាន ទណ្ឌិត សម រង្សុី ជាមេក្លោង ដែលគេកំពុងដឹកនាំក្រុមឧទ្ទាមក្រៅស្រុកមកផ្តួលរំលំរាជរដ្ឋាភិបាលស្របច្បាប់ គឺពួកគេកំពុងរៀបចំផែនការវិលត្រឡប់មកធ្វើរដ្ឋប្រហារនៅថ្ងៃទី៩ ខែវិច្ឆិកា ឆ្នាំ២០១៩ ខាងមុខនេះ។ដូច្នេះសូមបងប្អូនប្រជាពលរដ្ឋកុំជៀការបោកបញ្ឆោតហើយកុំទៅចូលរួមក្នុងចលនាជាមួយពួកក្បត់ជាតិនោះឲ្យសោះ៕ សេង ណារិទ្ធ