(ខេត្តកែប)៖ ស្ថិតក្នុងបរិបទនាពេលបច្ចុប្បន្ននេះ ក្រសួងអប់រំ យុវជន និងកីឡា បានដើរតួយ៉ាងសំខាន់ និងមានការទទួលខុសត្រូវខ្ពស់ក្នុងការកែទម្រង់លើវិស័យអប់រំ ការកសាងជំនឿទុកចិត្តចំពោះការងារអប់រំ ក៏ដូចជាគោលនយោបាយរបស់រាជរដ្ឋាភិបាល។
ការលើកឡើងបែបនេះជាប្រសាសន៍របស់ លោក កែន សត្ថា អភិបាល នៃគណៈអភិបាលខេត្តកែប ក្នុងពិធីសំណេះសំណាល និងចែកវិញ្ញាបនបត្របណ្តោះអាសន្ត ដល់សិស្សប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០១៩ នៅសាលប្រជុំធំសាលាខេត្តកែប នាព្រឹកថ្ងៃទី២៤ ខែតុលា ឆ្នាំ២០១៩ ដោយពិធីនេះក៏មានការអញ្ជើញចូលរួមពីលោកអភិបាលរងខេត្ត អភិបាលក្រុង ស្រុក ប្រធាន អនុប្រធានមន្ទីរ អង្គភាពជុំវិញខេត្ត កម្លាំងប្រដាប់អាវុធ លោកគ្រូ អ្នកគ្រូ សិស្សដែលប្រឡងសញ្ញាបត្រមធ្យមសិក្សាទុតិយភូមិទូទាំងខេត្ត។
លោកកែន សត្ថា បានបញ្ជាក់ទៀតថា ជាទូទៅយើងមិនដែលទុកឲ្យកូនណាម្នាក់ស្ថិតនៅក្រៅសាលា ឬមិនទទួលបានសេវាអប់រំនោះឡើយ គឺយើងបានផ្តល់លទ្ធភាពជូនដល់កុមារា កុមារី យុវជន យុវនារី ឲ្យបានចូលរៀន រៀនបានចប់តាមកម្រិតថ្នាក់ រហូតបានចប់ភូមិសិក្សាប្រកបដោយគុណភាព និងប្រសិទ្ធភាពខ្ពស់ឲ្យសមនឹងពាក្យថា”ចំណេះវិជ្ជាជាទ្រព្យគាប់ប្រសើរ”។
លោកអភិបាលខេត្ត បានបន្ថែមទៀតថា បច្ចុប្បន្ននេះការប្រកួតប្រជែងផ្នែកសេដ្ឋកិច្ច និងបច្ចេកវិទ្យាព័ត៌មាន បាននិងកំពុងទទួលបាននូវឧត្តមភាពយ៉ាងខ្លាំងក្លានៅលើសកលលោកយើងនេះ ក៏ប៉ុន្តែវាមិនអាចទៅជំនួសឲ្យធនធានមនុស្សបានឡើយ។ក្នុងន័យនេះពិតណាស់ថា សង្គមមួយអាចរីកចម្រើនបាន មិនប្រាកដថាសង្គមជាតិនោះសម្បូណ៌ទៅដោយធនធានធម្មជាតិនោះទេ តែផ្ទុយមកវិញសង្គមជាតិដែលសម្បូណ៌ធនធានមនុស្សប្រកបដោយសក្តានុពលអាចប្រែក្លាយសង្គមជាតិរបស់ខ្លួនឲ្យមានការអភិវឌ្ឃជឿនលឿនបានរឹងមាំ។ ធនធានមនុស្សល្អប្រកបដោយសមត្ថភាព គឺអាស្រ័យដោយការអប់រំល្អ និងមានគុណភាព។ដូច្នេះការអប់រំល្អគឺជាកូនសោសម្រាប់ដោះស្រាយនូវរាល់បញ្ហាសង្គមនិងសេដ្ឋកិច្ចជាតិ។
ជាក់ស្តែងក្នុងយុគសម័យសេដ្ឋកិច្ចពុទ្ធិ និងបច្ចេកវិទ្យាព័ត៌មាននេះ ឧត្តមភាពប្រកួតប្រជែងរបស់ប្រជាជាតិមួយនៅអាស្រ័យជាសំខាន់នូវកក្តាធនធានមនុស្សដែលមានចំណេះដឹង ចំណេះធ្វើទូលំទូលាយ មានភាពច្នៃប្រឌិត និងមានជំនាញច្បាស់លាស់។ប្រការទាំងនេះតម្រូវឲ្យរាជរដ្ឋាភិបាលបន្តផ្តោតការយកចិត្តទុកដាក់កាន់តែខ្លាំងឡើងៗទៅលើការអភិវឌ្ឍធនធានមនុស្ស ដែលជាការមុតស្រួចក្នុងការទ្រទ្រង់កំណើនសេដ្ឋកិច្ចកម្ពុជា មានចក្ខុវិស័យចង់ក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានប្រាក់ចំណូលកម្រិតខ្ពស់នៅឆ្នាំ២០៥០។
សូមជម្រាបថា បើយោងតាមរបាយការណ៍ របស់ លោក ងួន ច័ន្ទសុជាតា ប្រធានមន្ទីរអប់រំ យុវជន និងកីឡាខេត្តកែប បានបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡងថ្ងៃទី១៩ខែសីហា ឆ្នាំ២០១៩ មានបេក្ខជនក្នុងបញ្ជីប្រឡងចំនួន៣១៧នាក់ ស្រី១៧៧នាក់ ក្នុងនោះមានបេក្ខជនស្វៃរិនចំនួន០៦នាក់ ហើយបេក្ខជនដែលមកប្រឡងមានចំនួន៣១៥នាក់ ដោយបានប្រឡងជាប់មានសរុប២៨៨នាក់ ស្រីមាន១៦៦នាក់ ក្នុងនោះនិទ្ទេសAគ្មាន។ និទ្ទេសB មានចំនួន០៦នាក់ និទ្ទេសC មានចំនួន២៩នាក់ និទ្ទេសD មានចំនួន៦៤នាក់ និងនិទេសE មានចំនួន១៨៣នាក់
