ខេត្តកំពង់ធំ៖ ពុទ្ធិសមិទ្ធផលជាច្រើននៅក្នុងវត្តសម្ដេចជោតញ្ញាណ ហៅវត្តតាំងគោក ត្រូវបានដាក់អោយសម្ពោធប្រើប្រាស់ ក្រោមអធិបតីភាព ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធានក្រុមការងារចុះជួយស្រុកបារាយណ៍ និងស្រុកតាំងគោក ខេត្តកំពង់ធំ និងលោកជំទាវ ញឹក ស៊ីម ថោងខុន កាលពីថ្ងៃទី១៦ ខែកុម្ភៈ ឆ្នាំ២០២០ បានអញ្ជើញសម្ពោធ ។
ពុទ្ធិសមិទ្ធផលជាច្រើននៅក្នុងវត្តសម្ដេចជោតញ្ញាណ ហៅវត្តតាំងគោកដែលមានតម្លៃសរុបជាង ៩ម៉ឺនដុល្លារ ព្រមទាំងទទួល
បានថវិកាចូលរួមសទ្ធាបន្ថែមពីពុទ្ធបរិស័ទ និងសប្បុរសជននានាជាង ១៦,១០០,០០០រៀលទៀតផងដែរ។
វត្តសម្ដេចជោតញ្ញាណ ហៅវត្តតាំងគោក ជាវត្តមួយស្ថិតនៅភូមិតាំងគោក ឃុំសូរយោង ស្រុកតាំងគោក ស្របនឹងផ្លូវជាតិលេខ៦។ វត្តនេះមានអាយុកាល១៧៩ឆ្នាំមកហើយ ដែលកសាងឡើងដំបូងនៅលើផ្ទៃដីប្រមាណ ៣៤.៨៨ម៉ែត្រការ៉េ ចាប់ឆ្នាំ១៨៤១-១៩៧០ ក្រោមស្នាព្រះហត្ថរបសសម្ដេចព្រះសង្ឃរាជ ជួន ណាត ផងដែរ។
សូមជម្រាបថា សមិទ្ធផលដែលត្រូវសម្ពោធទាំងនោះ រួមមាន៖ របងខាងកើតប្រវែង ៩៦ម៉ែត្រ របងខាងជើងប្រវែង ៩៥ម៉ែត្រ ស្រះទឹកបណ្ដោយ ៦៧ម៉ែត្រ គុណទទឹង ១២ម៉ែត្រ កញ្ចុះក្នុងស្រះទឹក ផ្លូវបេតុងប្រវែង ១៥០ម៉ែត្រ ទទឹង ៦ម៉ែត្រ តដំបូលសាលាឆាន់ ៤៤ម៉ែត្រ ចាក់ដី បង្គោលភ្លើង ៦០ដើម ធ្វើដងទង់ និងជ្វាលា ៦០ដើម និងជីកអណ្ដូងស្នប់ចំនួន ២ សរុបការចំណាយថវិកា ៩១,៨៣៩ដុល្លារ និង ១,៨០០,០០០រៀលបន្ថែមទៀត។
ក្នុងឱកាសនោះ ឯកឧត្តមរដ្ឋមន្ត្រី បានអំពាវនាវសូមឱ្យប្រជាពលរដ្ឋថែរក្សាសុខភាព មានអនាម័យ សម្អាតដៃជាប់ជាប្រចាំ ដោយឈរលើគោលការណ៍ ហូបស្អាត ផឹកស្អាត និងរស់នៅស្អាត បន្តខិតខំការងារបង្កបង្កើនផលស្រូវ ដំណាំ ចម្ការ និងមុខរបរ ដើម្បីបង្កើនជីវភាព និងសេដ្ឋកិច្ចគ្រួសារ។
ឯកឧត្តមរដ្ឋមន្ត្រី ថោង ខុន ក៏បានប្រគល់ថវិកាឧបត្ថម្ភដល់វិទ្យាល័យ ហ៊ុន សែន តាំងគោកចំនួន ១លានរៀល លោកតាជីយាយជីចំនួន ១០០នាក់ ក្នុងម្នាក់ទទួលបានក្រណាត់មួយដុំ និងថវិកា ១ម៉ឺនរៀល និងឧបត្ថម្ភថវិកាសម្រាប់កសាងសមិទ្ធផលក្នុងវត្តបន្តចំនួន ១០លានរៀលទៀតផងដែរ៕