ភ្នំពេញ ៖ នារសៀលថ្ងៃទី១៩ ខែធ្នូ ឆ្នាំ២០១៩នេះ បើយោងតាមការបង្ហោះសារក្នុងបណ្តញសង្គមហ្វេសប៊ុករបស់កងរាជអាវុធហត្ថរាជធានីភ្នំពេញ បានលើកឡើងថា លោកឧត្តមសេនីយ៍ឯក រ័ត្ន ស្រ៊ាង បានអំពាវសុំឲ្យអ្នកសារព៏ត៌មានទាំងអស់ សូមយោគយល់ ចំពោះករណីខ្លះ ដែលសមត្ថកិច្ចកំពុងបន្តនិតិវិធី សូមមេត្តាកុំព្យាយាមផ្សព្វផ្សាយដែលអាចធ្វើឲ្យប៉ះពាល់ធ្ងន់ធ្ងរដល់ ការស្រាវជ្រាវរបស់សមត្ថកិច្ច។
សារដដែលនោះបានបបន្តទៀតថា ជាក់ស្តែងដូចជាករណី គ្រឿងញៀន ចោរប្លន់ ចោរលួច ចោរឆក់ ឬឃាតកម្មមួយចំនួន ភាគច្រើនគឺសុទ្ធតែជាប់ពាក់ព័ន្ធជាមួយមេក្លោងនិងបក្ខពួកច្រើននាក់ ដែលសមត្ថកិច្ចត្រូវបន្តធ្វើការស្រាវជ្រាវនិងតាមចាប់ ខ្លួន។
ដូច្នេះពេលសមត្ថកិច្ចធ្វើការបង្ក្រាបបទល្មើសនិងឃាត់ខ្លួន ជនសង្ស័យ ទោះនៅទីកន្លែងឯកជនក៏ដោយ ឬនៅលើទីសាធារណៈក៏ដោយ ប្រសិនបើសមត្ថកិច្ចសុំមិនបញ្ចេញព័ត៌មាន សូមឲ្យអ្នកសារព័ត៌មានមេត្តាយោគយល់ គោរពដល់តួនាទីភារកិច្ចរបស់សមត្ថកិច្ច និងវិជ្ជាជីវៈសារព័ត៌មានដោយអនុគ្រោះ ជៀសវាងការផ្សាយព័ត៌មានទាំងនោះ ប្រែក្លាយជាការជូនដំណឹងដល់មេក្លោងនិងបក្ខពួកជនល្មើសឲ្យមានការប្រុងប្រយ័ត្នកាន់តែខ្ពស់និងគេចខ្លួនកាន់តែឆ្ងាយ ប៉ុន្តែប្រសិនបើសមត្ថកិច្ចប្រមូលផ្តុំភស្តុតាងកំណត់អត្តសញ្ញាណក្រសោបមុខសញ្ញាបាន ឬមុខសញ្ញាត្រូវបានគេចខ្លួន បាត់តម្រុយ នោះ សមត្ថកិច្ចនឹងផ្តល់ព័ត៌មានជាចំហរជូនដល់អ្នកសារព័ត៌មាន៕